«Ақтөбе көлік прокуратурасы Қазақстан Республикасына әкелінген тауарлардың кедендік рәсімдеу құжаттарының заңдылығына талдау жүргізді. Тексеру жұмыстарының нәтижесінде Еуразиялық экономикалық одақтың техникалық регламент талаптарына сәйкестігіне қатысты мұнай құрылғылары бойынша 350-ден астам жалған декларация анықталды», - делінген Бас көлік прокуратурасының баспасөз қызметі таратқан ақпаратта.
Сотқа дейінгі тергеу амалдары барысында жалған құжаттардың әзірленуіне «KB Partnership» ЖШС брокері И.Е.Бегімовтың қатысы бары анықталған.
«Оның заңға қайшы әрекеттері салданынан 4 мұнай компаниясына 19 млн теңгенің шығыны келтірілді. Ақтөбе қалалық сотының үкімімен кінәлі азамат ірі көлемде алаяқтық жасағаны үшін (ҚР ҚК 190-бабы, 4-бөлігі) 5 жылға шартты түрде сотталды. Шығын толық көлемде өтелді. Сот шешімі күшіне енді», - делінген хабарламада.
Онымен бір мезгілде, прокуратураның қадағалау актісі бойынша «Ембі» кеден бекетінің екі лауазымды тұлғасына қызметіне толық сай келмейтіндігі туралы ескерту түріндегі тәртіптік жауапкершілікке тартылды.