Ақтөбеде полиция қызметкерлері есірткіні заңсыз сатумен айналысқан топты анықтады. Күдіктінің бірі қаланың өнеркәсіптік аймағында ұсталды. Тінту кезінде одан 246 орама анықталды. Түсі жасыл, өзіне
тән иісі бар зат бірден тәркіленді.
- Оқиға болған жерді тексеру барысында полиция қызметкерлері тағы 133
ораманы тәркіледі. Алдын ала мәлімет бойынша, күдіктілер есірткіні Telegram
мессенджеріндегі интернет-дүкен арқылы сатып алып, оны жасыру арқылы таратқан. Күдіктілердің бірі уақытша ұстау изоляторына қамалды. Қазіргі
уақытта тергеу амалдары жүргізіліп, оқиғаның барлық мән-жайы және
есірткінің заңсыз айналымына қатысы болуы мүмкін өзге де тұлғалар
анықталып жатыр,- деп хабарлады Ақтөбе облыстық ПД баспасөз қызметі.
Еске салсақ, Екібастұзда екі ағайынды гаражда синтетикалық есірткі өндірумен айналысқан. Тінту барысында 10 келіден астам «альфа-PVP» психотроптық заты, 860 литр химиялық сұйықтық, оның ішінде 300 литрлік реактор-сыйымдылық, зертханалық ыдыстар, таразылар және жеке қорғаныс құралдары тәркіленді.