АҚТӨБЕ. ҚазАқпарат - Ақтөбе қалалық мемлекеттік кірістер басқармасының қызметкері полицияға ғимаратта иесіз сөмкенің қалғанын хабарлаған. Мемлекеттік қызметкерлер дереу эвакуацияланды, деп хабарлайды ҚазАқпарат тілшісі.
Хабарламадан соң полиция қызметкерлері жедел түрде оқиға орнына шыққан.
«Ақтөбе қалалық ПБ жедел басқару орталығына күдікті зат табылғаны туралы хабарланды. Мемлекеттік кірістер басқармасының қызметкері ғимараттан қара сөмкенің иесіз қалғанын айтты. Полиция мен төтенше жағдайлар қызметі дереу оқиға орнына жетіп, келушілер мен қызметкерлерді эвакуациялады. Жақын маңдағы аумақты қоршауға алды. Табылған зат тексерілді. Сөмкеде жеке заттар, құжаттар және қомақ ақша табылды. Біраз уақыттан кейін сөмкенің иесі анықталды, оған полиция қызметкерлері сөмкені тапсырды»,- деді облыстық ПД баспаөз қызметкері Е. Сарқұлов.
Алтынай Сағындықова
2001-2006 ж.ж. Қ.Жұбанов атындағы Ақтөбе мемлекеттік университетін тәмамдады. Мамандығы - журналист. Еңбек жолын 2006 жылы "Kerek.info" қоғамдық-ақпараттық газетінен тілші болып бастап, шеф-редактордың орынбасары, шеф-редактор болды. Әртүрлі жылдары "Айқын" қоғамдық-саяси газеті, Bnews.kz, Aktobenews.kz тілші қызметін атқарды. 2017 жылдан бастап Kazinform агенттігінің Ақтөбе облысындағы меншікті тілшісі.