Ақтөбеде малдан қарасан ауруы анықталып, қыстақта карантин жарияланды

АҚТӨБЕ. KAZINFORM – Ойыл ауданы Шұбарши ауылы Таушанбаз қыстағындағы шаруа қожалығының малынан қарасан анықталды. Қыстақта карантин жарияланды.

«Мәтжан» шаруа қожалығының басшысы 12 ақпан күні Қоптоғай ауылдық округінің ветеринариялық пунктіне хабар берген. Ол сол кезде 4 бас ірі қараның өлгенін айтқан. 

— Бірден ветеринар мамандар барып, патологиялық материал алынды. Өлген жануарлардан алынған материал диагноз қою үшін Ақтөбе облыстық ветеринариялық зертханасына жіберілді. Ветеринариялық зертхананың сараптама актісінің нәтижесі бойынша қарасанға оң нәтиже көрсетті. Өлген жануарлардың өлексесі мал қорымына шығарылып жойылды, қалған жануарлар ветеринарлық мамандардың бақылауында. 27 ақпанда Көптоғай ауылдық округінің әкімінің шешімімен «Мәтжан» шаруа қожалығында мүйізді ірі қара малдарының арасында қарасан жұқпалы ауруының анықталуына байланысты карантин белгіленді. Эпизоотияға қарсы отряды сауықтыру іс-шарасын жүргізеді, — деп хабарлады Ақтөбе облыстық ветеринария басқармасы. Ақпаратқа сүйенсек, «Мәтжан» шаруа қожалығында 243 бас ірі қара, 700-ден астам ұсақ мал мен 7 бас жылқы бар. 

Еске салсақ, екі жыл бұрын Алға ауданы Тоқмансай ауылдық округінде «Өлетті» шаруа қожалығында 9 бас ірі қара өлді. Кейін малдың қарасан ауруынан өлгені анықталды.