АҚТӨБЕ. ҚазАқпарат –Ақтөбеде Кішіқұм ауылдық округіне қарасты Шоқсу стансасында жаңбырдан соң қой-ешкі бауырын көтере алмай қалды. Ауыл тұрғындары ұсақ жандықты бауыздап алған, деп хабарлайды ҚазАқпарат тілшісі.
Ақтөбе облысы, Шалқар ауданы, Кішіқұм ауылдық округіне қарасты Шоқсу стансасында оқыс оқиға тіркелді. Әлеуметтік желідегі бейнежазбадан қой-ешкінің бауырын көтере алмағанын көруге болады. Барлығы 15 ешкі мен 35 қой жауыннан соң тұра алмай қалды.
«Қойды қырыққан соң жайылымға жіберген. Сол кезде бұршақ аралас жаңбыр жауып, жел соққан. Ауыл тұрғындары жайылымға жіберген малын уақтылы бауыздап үлгерді. Сөйтіп өзара таратып алған. Ешкімнен шағым түспеді. Шығын емес, тек сойып алған»,- деді Ақтөбе облыстық ветеринария басқармасы басшысының міндетін атқарушы Иса Базаров.
Алтынай Сағындықова
2001-2006 ж.ж. Қ.Жұбанов атындағы Ақтөбе мемлекеттік университетін тәмамдады. Мамандығы - журналист. Еңбек жолын 2006 жылы "Kerek.info" қоғамдық-ақпараттық газетінен тілші болып бастап, шеф-редактордың орынбасары, шеф-редактор болды. Әртүрлі жылдары "Айқын" қоғамдық-саяси газеті, Bnews.kz, Aktobenews.kz тілші қызметін атқарды. 2017 жылдан бастап Kazinform агенттігінің Ақтөбе облысындағы меншікті тілшісі.