Облыс әкімінің баспасөз қызметінің хабарлауынша, гір көтеру спортынан әлем чемпионаты қазан айының 26-30 күндері «Қоныс» спорт сарайында өтеді. Дайындық жұмыстары тамыздың жиырмасынан басталады. Ұйымдастыру комитетінің құрамына облыстық федерация өкілдері мен дене шынықтыру және спорт басқармасының қызметкерлері кіреді. Чемпионатқа 35 елден 700-ге тарта спортшы қатысады. Қатысуға өтініш беру қыркүйектің екінші жартысында аяқталады.
Жиында Бердібек Сапарбаев шараны жоғары деңгейде өткізуді тапсырды.
- Бұл - өңірдегі спортты дамытуға және ілгерілетуге ықпал ететін маңызды шара. Біз чемпионаттың жоғары деңгейде өтуі үшін бар күшімізді салуымыз керек, - деді өңір басшысы.
Облыс әкімі әлемдік деңгейдегі спорттық бәскелестікке дайындық кезінде еліміздің ұлттық ерекшелігін көрсету керектігін атап өтті.