ОРАЛ. ҚазАқпарат - Ақтөбе қаласында Ұлттық ұлан жауынгерлері 1,2 млн теңгенің заңсыз тасымалдануына тосқауыл қойды, деп хабарлайды «ҚазАқпарат» тілшісі.
«Батыс» өңірлік қолбасшылығының баспасөз қызметінен түскен мәліметке қарағанда, 31 мамыр күні сағат 12.00 шамасында УГ 168/2 қылмыстық-атқару жүйесі мекемесіндегі бақылау бекетінде 6655-әскери бөлімінің қызметкерлері, кіші сержант Рахат Әлібеков, қарауыл бастығының кинологиялық қызмет жөніндегі көмекшісі, сержант Талғат Елубаев және қатардағы жауынгер Полихрон Другов «МАН 19240» жүк көлігін тексеру кезінде кабинадан DVD таспасына арналған панельдің астынан 1,2 млн теңге тапқан.
Тыйым салынған затты тәркілеу туралы бірлескен акт түзіліп, түзету мекемесінің қызметкерлеріне тапсырылды. Сол бойда оқиға орнына Ақтөбе қалалық ішкі істер басқармасының жедел тергеу тобы шақырылды.
Қырағылығы үшін аталған жауынгерлерді «Батыс» өңірлік қолбасшылығы ынталандырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).