ДОХА. KAZINFORM - Қазақстанның бірінші, әлемнің 21-ракеткасы Александр Бублик Доха ATP 250 турнирінің ширек финалына шықты.
Жарыстың 4-ракеткасы болып тіркелген қазақстандық теннисші екінші айналымда дүниежүзілік рейтингіде 80-орында тұрған Мажарстан өкілі Мартон Фучовичпен кездесті.
Бірінші партияда мажарстандық спортшы 6:2 есебімен басым түсті.
Есесіне содан кейін Бублик ұрымтал сәттерде шеберлігін көрсете білді - 6:3, 6:4.
Екі сағат 7 минутқа созылған бәсеке барысында Бублик 5 эйспен бірге 11 брейк-пойнттың төртеуін пайдаланды. Фучович 2 эйс, 4 брейкпен (7 брейк-пойнт) көзге түсті.
Александр Бублик жартылай финалға шығу үшін әлемнің 46-ракеткасы, австралиялық Алексей Попыринмен таласады. Ол рейтингіде 151-сатыдағы франциялық Уго Греньені ұтты - 7:6 (7:3), 6:7 (8:10), 6:1.
Еске сала кетейік, бұдан бұрын Елена Рыбакинаның Дубайда 13 эйс жасап, ширек финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).