АСТАНА. KAZINFORM – Қазақстанның екінші, әлемнің 104-ракеткасы Александр Шевченко Аделаида (Аустралия) ATP 250 турнирінің екінші айналымына өтті.
Жарысты іріктеу сайыстарынан бастаған қазақстандық теннисші алғашқы айналымда әлемнің 66-ракеткасы, босниялық, 33 жастағы тәжірибелі Дамир Джумхурмен бетпе-бет келді.
Бірінші партияда босниялық спортшы 6:4 есебімен басымдылық танытты. Бұдан кейін Шевченко ойын тізгінін қолына алып, камбэк жасай білді – 6:4, 7:5.
Екі сағат жарымға жуық уақытқа созылған тартысты бәсекеде А.Шевченко 7 эйспен бірге 10 брейк-пойнттың алтауын өз есебіне жазды. Джумхур 1 эйс, 5 брейкпен (9 брейк-пойнт) көзге түсті.
Александр Шевченко ширек финалға шығу үшін әлемнің 55-ракеткасы, мажарстандық Мартон Фучович немесе рейтингіде 78-орындағы америкалық Итан Куинның қай жеңгенімен таласады.
Еске сала кетейік, бұдан бұрын Қазақстанның теннистен әлемдегі үздік елдердің қатарына енгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).