АСТАНА. KAZINFORM – Қазақстанның екінші, әлемнің 104-ракеткасы Александр Шевченко сенсация жасап, Аделаида (Аустралия) ATP 250 турнирінің ширек финалына өтті.
Қазақстандық теннисші екінші айналымда әлемнің 55-ракеткасы, мажарстандық Мартон Фучовичпен бетпе-бет келді.
Фучович фаворит саналғанымен, Шевченко бірінші партияны өз есебіне жазды – 6:3. Тартысты өрбіген екінші сетте А.Шевченко тай-брейкте шеберлігінің басым екенін байқатты – 7:6 (8:6).
Бір сағат 43 минутқа созылған бәсекеде Шевченко 9 эйспен бірге 10 брейк-пойнттың біреуін пайдаланды. Фучович 7 эйс жасағанымен, 3 брейк-пойнттан ештеңе шығара алмады.
Александр Шевченко жартылай финалға шығу үшін әлемнің 36-ракеткасы, франциялық Уго Умбермен таласады.
Еске сала кетейік, бұдан бұрын Юлия Путинцеваның Аустралиядағы жарыстың екінші айналымына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).