АСТАНА. KAZINFORM – Қазақстанның екінші, әлемнің 100-ракеткасы Александр Шевченко Братислава (Словакия) челленджер турнирінің жартылай финалына өтті.
Жарыстың 1-ракеткасы болып тіркелген қазақстандық теннисші ширек финалда дүниежүзілік рейтингіде 287-орында тұрған италиялық Федерико Чинаның меселін қайырды.
Бірінші партияда Шевченко тай-брейкте ептілік танытты – 7:6 (7:3). Екінші сетте 6:4 есебі тіркелді.
Бір сағат 35 минутқа созылған бәсекеде А.Шевченко 5 эйспен бірге 11 брейк-пойнттың алтауын өз есебіне жазды. Чина 5 брейкпен (10 брейк-пойнт) ерекшеленді.
Александр Шевченко финалға шығу үшін әлемнің 124-ракеткасы, франциялық Валентин Ройе немесе рейтингіде 288-сатыдағы германиялық Марко Топоның қай жеңгенімен таласады.
Еске сала кетейік, бұдан бұрын Александр Бубликтің Лондон ATP 500 турниріне шақырту алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).