Әлеуметтік желіге жарияланған видеодан мемлекеттік нөмірі жоқ Nissan Primera автокөлігінің жүргіншілер жолындағы еркін қозғалысы көрінеді. Жүргізуші көлігімен Ақтөбе қаласы Тұңғыш Президент атындағы саябақтан Ғ. Жұбанова көшесіне дейінгі аралықта жүрген.
- Полиция заңға бағынбай, қоғамға қауіп төндірген жүргізушінің кім екенін жедел анықтады. Ақтөбе қаласының тұрғыны өзінің әрекетін «әлеуметтік желідегі танымалдылық үшін» деп түсіндірді. Полиция қызметкерлері құқық бұзушыға қатысты әкімшілік заңнаманың 6 бабы бойынша хаттама толтырылды. Атап айтқанда, автокөлікті мемлекеттік нөмірсіз басқару, қауіпсіздік белдігін тақпау, жол белгілері мен маневр жасау қағидаларын сақтамау, жарық-дыбыстық сигналдарды заңсыз қолдану және ұсақ бұзақылық та бар. Сот жүргізушіні 10 тәулік әкімшілік қамаққа алып, айыппұл салу туралы шешім шығарды. Айыппұлдың жалпы көлемі 160 мыңнан асады,- деді Ақтөбе облыстық ПД баспасөз қызметі.
Ұсталған жүргізуші видеоны TikTok әлеуметтік желісіне салып, қаралым мен лүпіл, пікір жинамақ болған.
- Мұндай іс-әрекет осындай жағдайға әкеледі деп ойламадым. Шын ниетпен өкінемін. Лүпіл, қаралым жинау үшін болды,-деді жүргізуші.
Еске салсақ, Өскемен қаласында 59 рет жол ережесін бұзған шетелдік жүргізуші тоқтатылды. Тексеру барысында ер адамның Қазақстан Республикасында тұрақты тұруға рұқсаты бар екені анықталды.