Алматы облысы дін істері басқармасының мәліметінше, биыл 21 қазанда Ұзынағаш ауылында түскен жедел ақпаратты тексеру мақсатында ювеналдық полиция, жергілікті полиция қызметі, прокуратура, облыстық Дін істері басқармасы, сондай-ақ ішкі саясат және білім бөлімдерінің өкілдері бірлескен рейдік іс-шара жүргізген. Тексеру кезінде деструктивті діни ағымды ұстанушы А. есімді азамат жеке меншік нысанында кәмелетке толмаған балаларға араб тілі мен Құраннан заңсыз дәрістер жүргізіп келгені анықталды.
- Білім бөлімі мен мектеп әкімшіліктерінің үйлестіруімен оқиға орнына оқушылардың ата-аналары шұғыл түрде шақырылды. Жүргізілген құқықтық бағалау нәтижесінде, балаларға заңсыз діни дәріс өткізген азамат ҚР Әкімшілік құқық бұзушылық туралы кодексінің 490-бабы 1-бөлігі 1-тармағына (діни қызмет және діни бірлестіктер туралы заңнамасын бұзу) сәйкес әкімшілік жауапкершілікке тартылды, - деп хабарлады басқармадан.
Сонымен қатар кәмелетке толмаған балаларын тәрбиелеу жөніндегі міндеттерді орындамағаны үшін ата-аналарға қатысты ӘҚБтК-нің 127-бабы аясында ескерту жасалған.
Еске салайық, бұған дейін Алматы облысында тыйым салынған «Хизб ут-Тахрир» ұйымының жасырын тобы анықталды.