АЛМАТЫ. KAZINFORM — Әлеуметтік желілерде «әскерилердің қимыл-әрекеттеріне байланысты Алматының әуе кеңістігі жабылып, әскери жағдай енгізілді» деген ақпарат тарады. Алайда Қорғаныс министрлігі бұл мәлімет шындыққа сәйкес келмейтінін хабарлады.
Ведомство Алматының әуе кеңістігіне ешқандай шектеу енгізілмегенін мәлімдеді.
— Әуе кеңістігін пайдалану Қазақстан Республикасының заңнамасының талаптарына сәйкес уәкілетті органдар арқылы жүзеге асырылады. Әлеуметтік желілерде таралған ақпараттың жалған екенін естеріңізге саламыз, — делінген хабарламада.
Мұның алдында Алматы халықаралық әуежайы да бұл ақпаратты жоққа шығарған еді.
Әуежайдың баспасөз қызметінің мәліметінше, нысан штаттық режимде жұмыс істеп тұр және рейстерге қатысты ешқандай шектеу жоқ.
Мейірман Лес
Еуразия ұлттық және Қазақ ұлттық университеттерін бітірген. Республикалық "Ұлан" газетінде, Baribar.kz, Holanews.kz, Zakon.kz, Tengrinews.kz, Massaget.kz, Ulysmedia.kz порталдарында журналист, продюсер, шығарушы/шеф/бас редактор қызметтерін атқарған. 2025-2026 жылдары Kazinform агенттігінің Алматыдағы меншікті тілшісі болып еңбек етті, қазір қазақ редакциясының шығарушы редакторы.