Алматыда екі қабатты ғимарат сот шешімімен бұзылып жатыр
АЛМАТЫ. KAZINFORM — Алматыда Тілендиев көшесі, 137 мекенжайында заңсыз салынған екі қабатты ғимарат бұзылып жатыр.
Қала құрылысын бақылау басқармасынан хабарлағандай, меншік иесіне рұқсат құжаттарының толық болмауына байланысты әкімшілік шара қабылданып, бұзушылықтарды жою туралы нұсқама берілген.
— Кейін нысанды бұзу туралы талап-арыз сотқа жолданды. Алмалы аудандық соты нысанды заңсыз деп таныды. Ал өткен жылдың 20 тамызында Алматы қалалық соты бірінші сатыдағы соттың шешімін өзгеріссіз қалдырды, — делінген басқарма хабарламасында.
Сот шешімін орындау мақсатында меншік иесі ғимаратты бұзу жұмыстарын бастап кетті.
Осыған дейін Алматыда мемлекеттік қордың жерінде заңсыз орнатылған стационарлық емес сауда нысандарын бөлшектеу жұмыстары жүріп жатқаны туралы жазған едік.
Сондай-ақ Алматыда соңғы екі жылда 65 заңсыз нысан, оның ішінде тұрғын үй кешендері толығымен немесе ішінара бұзылғаны туралы жазғанбыз.