Алматыда тұмау жұқтырғандардың 60 пайызы балалар

АЛМАТЫ. KAZINFORM — Алматыда өткен аптада 7527 бала тұмау жұқтырған.

Бұл туралы Алматы қаласы Санитарлық-эпидемиологиялық бақылау департаментінің басшысы Қасымхан Алпысбайұлы айтты.

Оның айтуынша, өткен аптада ЖРВИ, тұмау ауруларының 12164 жағдайы тіркелген. 100 мың тұрғынға шыққандағы көрсеткіші — 530.

— Тұмау жұқтырғандардың саны өткен жылдың осы кезеңімен салыстырғанда 2 есе төмен және алдыңғы аптамен салыстырғанда 34,8% пайызға (18659 жағдай) азайған. Жалпы бұл аурудың 61,9% балаларды қамтиды. Сонымен қатар, қалада жіті респираторлық вирустық инфекциялардың басқада вирустары: риновирус, бокавирус, РС вирус, аденовирус, парагрипп, маусымдық коронавирустар айналымда жүр, — деді Қасымхан Алпысбайұлы.

Санитарлық-эпидемиологиялық бақылау департаментінің мәліметіне сәйкес, ЖРВИ-ға зерттелген 107 сынаманың 33-інде тұмауға жатпайтын басқа да ЖРВИ вирустары анықталған. Алайда олардың қатарында ЖРВИ-дың бір түріне жататын метапневмовирус анықталған жоқ.

Еске салайық, бұған дейін ҚР Денсаулық сақтау министрлігі ел аумағында метапневмовирустық инфекция жағдайлары анықталғанын хабарлады.

Атап айтқанда, СҚО-да төрт адамнан метапневмовирус анықталды.