Алматыда туризм саласынан түскен салық түсімі екі есеге артты
АЛМАТЫ. KAZINFORM – 2024 жылдың тоғыз айында Алматыға 1,7 млн турист келді, бұл 2023 жылдың осы кезеңімен салыстырғанда 14,2%-ға көп.
– Қонақтар санының артуы қала экономикасына тікелей әсер етті: туризм саласынан түскен салықтық түсімдері 11 айда 85,5 миллиард теңге болды. Бұл өткен жылғы көрсеткіштен 2 есеге артық. Негізгі капиталға салынған инвестиция 92,9 миллиард теңгеге жетті,– деп хабарлады әкімдіктен.
Жеке қаражат есебінен қалада 35 жаңа орналастыру нысаны ашылды, оның ішінде 20 қонақүй, 4 глэмпинг, 8 хостел және 3 қонақ үй бар. Бұл 836 бөлме қосып, туристерді қабылдау инфрақұрылымын айтарлықтай нығайтты.
– 2025 жылы қала инвесторларды тартуды, туристік инфрақұрылымды дамытуды және халықаралық аренадағы орнын нығайтуды жалғастырып, Алматыны Орталық Азияның жетекші туристік бағыты ретінде одан әрі ілгерілетуді жоспарлап отыр,–деп атап өтті әкімдіктен.
Еске салайық, Алматы саяхаттауға тұрарлық ең үздік орындар тізіміне енді.
Осыған дейін Алматыға 1,7 миллионнан астам турист келгені туралы жазған едік.
Алматы - елдің қаржылық, ғылыми, мәдени және экономикалық орталығы ғана емес, сонымен қатар туристік орталық.Ондағы табиғатты, тарихи және көрікті жерлерді тамашалауға, демалуға әлемнің түкпір-түкпірінен туристер көптеп келеді.