АСТАНА. ҚазАқпарат – Өскеменнің «Алтайы» Вьетнамда (Виньфук) волейболдан өтіп жатқан ХХІІІ Азия клубтық чемпионатында екінші жеңісіне қол жеткізді, деп хабарлайды ҚазАқпарат тілшісі.
Юрий Панченконың шәкірттері «В» тобында бүгін Моңғолияның «Khuvsgul Erchim VC» командасымен шеберлік байқасты. Матч өскемендіктердің айқын басымдылығымен өтіп, олар 25:12, 25:9, 25:11 есебімен жеңіске жетті.
Бәсеке барысында команда капитаны Сана Анарқұловаға қоса, Светлана Парухова, Ирина Малькова, Сара Сакрадзия, Анджела Веселинович, Елизавета Мейстер, Валерия Чумак, Мәдина Бекет, Томирис Сағымбаева, Зарина Ситқазинова секілді ойыншылар бір-бірін алмастырып, алаңға шықты.
Осылайша, «Алтай» екі турдан кейін 5 ұпай жинады. Ертең өскемендіктер өз тобындағы басты қарсыласы, қытайлық «Liaoning Donghua VC» клубымен сынға түседі. Егер оны жеңсе, өз тобынан жартылай финалға бірінші орынмен шығатындай мүмкіндік бар.
Еске сала кетейік, бұдан бұрын Өскеменнің «Алтайының» волейболдан Азия клубтық чемпионатын жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).