АСТАНА. KAZINFORM — Қазақстанның жұптық сындағы бірінші, әлемнің 7-ракеткасы Анна Данилина Сен-Мало (Франция) челленджер турнирінің ширек финалына жолдама алды.
Жарыстың 1-ракеткасы болып тіркелген А.Данилина америкалық Эйжа Мухаммадпен бірге бастапқы кездесуінде тайбэйліктер Йе Цен Чо – Хсуань Чоға тап келді.
Матч 6:2, 6:3 есебімен қазақстандық-америкалық жұптың пайдасына шешілді.
Бір сағаттан астам уақытқа созылған бәсекеде Данилина – Мухаммад 8 брейк-пойнттың тең жартысын өз есептеріне жазды.
Анна Данилина – Эйжа Мухаммад жартылай финалға шығу үшін ресейліктер Ирина Хромачева – Ксения Зайцевамен таласады.
А.Данилина – Э.Мухаммад осыған дейін Мадрид WTA 1000 турнирінде алғашқы айналымда-ақ ұтылып қалған еді.
Еске сала кетейік, бұдан бұрын Шымкент турнирінде Денис Евсеевтің 18 жастағы Әмір Омархановты жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).