АСТАНА. KAZINFORM — Қазақстанның жұптық сындағы бірінші, әлемнің 6-ракеткасы Анна Данилина Лондондағы WTA 500 The Queen’s Club Championships турнирін жеңіспен бастады.
Сербиялық Александра Круничпен бірге жарыстың 1-ракеткасы болып тіркелген А.Данилина алғашқы кездесуін америкалық Куинн Глисон – норвегиялық Ульрикке Эйкеримен өткізді.
Қазақстандық-сербиялық дуэт 6:2, 6:4 есебімен жеңіске жетті.
Бір сағат 27 минутқа созылған бәсеке барысында Данилина – Крунич 7 эйспен бірге 7 брейк-пойнттың үшеуін пайдаланды.
Анна Данилина – Александра Крунич жартылай финалға шығу үшін ұлыбританиялық Оливия Николлс – словакиялық Тереза Михаликовамен таласады.
Мұның алдында А.Данилина – А.Крунич Ролан Гаррос турнирінің финалына дейін жеткен болатын.
Лондон додасында жекелей сында Қазақстанның бірінші, әлемнің 2-ракеткасы Елена Рыбакина өнер көрсетеді. Ол екінші айналымда өткен жылғы чемпион, әлемнің 52-ракеткасы, германиялық Татьяна Мариямен кездеседі. Бұл ойын 11 маусымға белгіленген.
Еске сала кетейік, бұдан бұрын Александр Шевченконың Словакиядағы турнирді сәтті бастағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).