Қазақстанның жұптық сындағы бірінші ракеткасы Анна Данилина Окленд (Жаңа Зеландия) WTA 250 турнирінің жеңімпазы атанды, деп хабарлайды Kazinform.
Жарыстың 2-ракеткалары болып тіркелген А.Данилина — словакиялық Виктория Грунчакова финалда чехиялық Мария Боузкова — америкалық Бетани Маттек-Сандспен бас жүлде үшін кортқа шықты.
Бірінші партияда қазақстандық-словакиялық жұп 6:3 есебімен басым түсті.
Екінші сетте тай-брейкте чехиялық-америкалық дуэт сәтті ойнады — 7:6 (7:5).
Супер тай-брейкте А.Данилина мен В.Грунчакова жеңісті жұлып алды — 10:8.
Екі сағатқа жуық уақытқа созылған матчта олар 2 эйспен бірге 7 брейк-пойнттың алтауын құр жібермеді.
Қарсылас жұп 4 эйс, 4 брейкпен (9 брейк-пойнт) көзге түсті.
Осылайша, Анна Данилина жаңа жылдағы алғашқы титулына қол жеткізді.
Еске сала кетейік, бұдан бұрын Елена Рыбакинаның байырғы қарсыласын жеңіп, Брисбен турнирінің жеңімпазы атанғанын жазған болатынбыз.
Сондай-ақ Елена Рыбакина әлемдік рейтингіде қайтадан үшінші ракетка болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).