АСТАНА. KAZINFORM - Қырғызстан астанасы Бішкек қаласында өтіп жатқан Азия чемпионатында ел құрамасының қоржыны тағы бір жүлдемен толықты.
61 келі салмақ дәрежесінде жарыс жолына шыққан қазақстандық балуан Асыл Айтақын финалда қырғызстандық Тайырбек Жумабек уулунан 3:1 есебімен жеңіліп қалды. Осылайша отандасымыз күміс жүлдені қанағат тұтты.
Бұған дейін ел құрамасынан 86 келі салмақта Азамат Дәулетбеков Азия чемпионы атанған болатын. Сондай-ақ бүгін Талғат Сырбаз (74 келі) қола жүлдеге таласады. Ал, Әділет Давлумбаев (92 келі) пен Абылай Совет (125 келі) жарыс жолынан ертерек шығып қалды.
Айта кетсек, жарыстың алғашқы күні, 11 сәуірде Ризабек Айтмұқан (97 келі) күміс, Мейрамбек Қартбай (57 келі) қолаға қол жеткізді.
Енді 13-14 сәуір күндері әйелдер, 15-16 сәуірде грек-рим шеберлері боз кілемге шығады.
Құрлықтық додада еркін күрес, грек-рим және әйелдер күресінен барлығы 30 медаль жиынтығы сарапқа салынады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.