ОРАЛ. 22 қазан. ҚазАқпарат - ҚР ІІМ ішкі әскерлері «Батыс» өңірлік қолбасшылығында «Әскерде діни экстремизмнің алдын алу» тақырыбында дөңгелек үстел отырысы болды.
Қолбасшылықтың баспасөз қызметінен түскен мәліметке қарағанда, шараға Орал гарнизоны әскери прокуратурасы, әскери полиция, БҚО дін істері басқармасы, діни конфессиялар өкілдері де қатысып, өз пікірлерін ортаға салды.
Орал гарнизоны прокурорының аға көмекшісі, әділет аға лейтенанты Мейірбек Мұсабеков, «Батыс» өңірлік қолбасшылығы тәрбие және әлеуметтік-құқықтық жұмыстар басқармасының бастығы, подполковник Әлішер Әбдірасыл және басқалар сөз алып, әскери қызметкерлер арасында діни ағартушылық жұмыстар жүргізу, экстремистік бағыттағы пиғылдарға тосқауыл қоюдың қажеттігін атап көрсетті. Жат ағымдардың таралуына жастардың хабардар болмауы, діни сауатының төмендігі, қоғамның әлеуметтік жіктелуі сеп болады. Мұның алдын алу үшін тиісті үгіт-насихат жұмыстарын жүргізудің маңызы зор.
Жиын қорытындысы бойынша әскерде діни экстремизмнің алдын алу бағытында бірлескен шаралар жүргізу жөнінде шешім қабылданды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).