ОРАЛ. KAZINFORM – Конкурстық комиссия қорытындысына сәйкес, облыс әкімінің өкімімен Аслан Тапишев БҚО Дін істері басқармасы басшысы болып тағайындалды.
БҚО әкімінің баспасөз қызметінен мәлім еткеніндей, А.Тапишев 1985 жылы Орал қаласында дүниеге келген.
Білімі жоғары. Батыс Қазақстан инженерлік-гуманитарлық университетін құқықтану мамандығы бойынша тәмамдаған.
Әр жылдары «Жасыл ел» жастар еңбек жасақтарының республикалық штабы БҚО филиалының басшысы, «Батыс Қазақстан облыстық Азаматтық альянсы» ЗТБ президенті, БҚО әкімдігі қоғамдық даму басқармасының жастармен жұмыс жөніндегі ресурстық орталығының басшысы болып қызмет атқарды.
Қазіргі лауазымға дейін Орал қаласы әкімінің орынбасары болды.
Облыс әкімінің орынбасары Қайыржан Меңдіғалиев жаңа басшыны ұжымға таныстырып, сәттілік тіледі.
Еске сала кетейік, бұдан бұрын Бейімбет Мусиннің БҚО Энергетика және тұрғын үй-коммуналдық шаруашылық басқармасын басқаратынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).