НҰР-СҰЛТАН. ҚазАқпарат - Қазақстандық Дмитрий Попко Astana Open ATP 250 турнирінің екінші айналымына шыға алмады, деп хабарлайды ҚазАқпарат тілшісі.
Дүниежүзілік рейтингте 188-орында тұрған Д.Попко алғашқы айналымда әлемнің 48-ракеткасы, осы жарыстың өткен жылғы чемпионы, аустралиялық Джон Миллманмен күш сынасты.
Қазақстандық теннисші матчты қос брейкпен сәтті бастады - 6:3.
Алайда осыдан кейін Д.Миллман ойын тізгінін өз қолына алып, 6:1, 6:4 есебімен жеңіске жетті.
Екі сағаттан астам уақытқа созылған матчта Попко 3 эйс жасап, 9 брейк-пойнттың үшеуін ғана пайдаланды. Қарсыласы 4 эйс, 5 брейкке (6 брейк-пойнт) қол жеткізді.
Д.Миллман екінші айналымда әлемнің 71-ракеткасы, испаниялық Хауме Муньярмен шеберлік байқасады.
Еске сала кетейік, бұдан бұрын Тимофей Скатовтың тәжірибелі теннисшіні жеңіп, екінші айналымға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).