Астанада азық-түлікке артық үстеме қосқан 60-тан астам кәсіпкер анықталды

АСТАНА. KAZINFORM – Елордада жыл басынан бері сауда саласындағы заңбұзушылықтарға байланысты 162 әкімшілік іс қозғалған. Айыппұлдардың жалпы сомасы 3,3 млн теңгеге жуықтады. Бұл туралы Астана қаласы бойынша Сауда және тұтынушылардың құқықтарын қорғау департаментінің басшысы Еркебұлан Тағашов мәлімдеді.

Фото: Алматы әкімдігі

Оның айтуынша, биыл әлеуметтік маңызы бар азық-түлік тауарларына қосылатын сауда үстемесін 15 пайыздан асырған 60-тан астам кәсіпкер анықталған.

Заңға сәйкес, аталған өнімдерге қосылатын сауда үстемесі өндірушінің сату бағасынан немесе көтерме жеткізушінің сатып алу бағасынан 15 пайыздан аспауға тиіс.

Биыл 1 қаңтардан бастап бұл талапты алғаш рет бұзғандарға ескерту берілмей, бірден айыппұл салынады. Оның мөлшері жеке тұлғалар мен шағын кәсіпкерлік субъектілері үшін 5 АЕК, орта кәсіпкерлік субъектілері үшін 35 АЕК, ірі кәсіпкерлік субъектілері үшін 150 АЕК болып белгіленген. Заңбұзушылық бір жыл ішінде қайталанса, айыппұл мөлшері екі есе артады.

Департамент мәліметінше, 162 әкімшілік істің 135-і сауда үстемесін асыруға, 20-сы баға белгілеріне қойылатын талаптарды бұзуға, жетеуі базарларды жаңғырту талаптарын сақтамауға қатысты.

Қазір елордадағы ірі сауда желілерінде, базарлар мен үй маңындағы дүкендерде азық-түлік бағасы апта сайын бақыланады.

– Біздің міндетіміз – құқық бұзушылықтарды анықтаумен ғана шектелмей, бүкіл сауда тізбегінің ашықтығын қамтамасыз ету. Біз өнімнің өндірушіден соңғы сатушыға дейінгі қозғалысын қадағалап, бағаны негізсіз көтеруге жол берген кәсіпкерлік субъектілеріне қатысты шаралар қабылдаймыз, – деді Еркебұлан Тағашов.

Сондай-ақ елордада бағаның негізсіз өсу себептерін анықтайтын өңірлік комиссия жұмыс істейді. Жыл басынан бері комиссияның 90 отырысы өтіп, 150-ден астам заңбұзушылық анықталған.

Бұған дейін Солтүстік Қазақстан облысында азық-түлік бағасын негізсіз көтерген 126 кәсіпкердің жауапкершілікке тартылғанын жазған едік.