СҚО-да азық-түлікті негізсіз қымбаттатқан 126 кәсіпкер жазаланды

СҚО бойынша Сауда және тұтынушылардың құқықтарын қорғау департаментінің мәліметінше, биылғы он айда сауда саласындағы заңбұзушылықтар үшін жауапқа тартылған кәсіпкерлік субъектілерінің жалпы саны 135-ке жетті.

Заңбұзушылықтар бірінші сұрыпты бидай ұны, күріш, қарақұмық жармасы, тауықтың сан еті, сары май, күнбағыс майы мен көкөністерді сату кезінде анықталған.

- Қазақстан заңнамасына сәйкес, әлеуметтік маңызы бар азық-түлік тауарларын сатудағы сауда үстемесі 15% аспауға тиіс. Алайда жүргізілген тексерулер кезінде бірқатар кәсіпкердің бұл талапты сақтамағаны анықталды. Биыл 19 қазаннан бастап ішкі сауда қағидаларына өзгеріс енгізілді. Енді әлеуметтік маңызы бар азық-түлік өнімдерін тасымалдауға нақты жұмсалған шығындар құжатпен расталған жағдайда, оларды сауда үстемесіне қосуға рұқсат етіледі. Ал тауарды өткізуге байланысты басқа шығындар белгіленген үстеме шегінде ескерілуі керек, - дейді департамент басшысының орынбасары Ғалымжан Абаев.

Талапты бұзғандарға айыппұл қарастырылған. Оның мөлшері кәсіпкерлік субъектісінің санатына қарай 5-150 айлық есептік көрсеткішке дейін жетеді. Егер құқықбұзушылық әкімшілік жаза қолданылғаннан кейін бір жыл ішінде қайталанса, айыппұл мөлшері 10-300 АЕК-ке дейін өседі.

- Тауар бағасының қай кезеңде өсетінін анықтау үшін облыс әкімдігі жанында делдалдық схемаларды тергеп-тексеру жөніндегі өңірлік комиссия жұмыс істейді. Комиссия жұмысына жергілікті атқарушы органдардың, Сауда және тұтынушылардың құқықтарын қорғау департаментінің, мемлекеттік кірістер және экономикалық тергеп-тексеру органдарының, сондай-ақ Бәсекелестікті қорғау және дамыту агенттігінің аумақтық департаментінің өкілдері қатысады. Нәтижесінде, үш ірі сауда желісі, 15 көтерме жеткізуші және үй маңындағы дүкендер әкімшілік жауаптылыққа тартылды, - дейді Ғалымжан Абаев.

Бұған дейін Алматыда азық-түлік бағасын негізсіз көтерген кәсіпкерлерге 80 млн теңгеден астам айыппұл салынғанын жазған едік.