«Бүгін Нұр-Сұлтан қаласында Көркем гимнастика орталығында – Тәуелсіздік сарайында ел чемпионаты өтіп жатыр. 3-7 мамыр күндері спорт шеберлері, сондай-ақ 8-12 мамыр күндері спорт шеберлігіне үміткер және 1-разряд арасында Қазақстанның екі чемпионаты ұйымдастырылады. Онда 500-ден аса спортшы бақ сынайды.
Сол сияқты еліміздің барлық өңірінен жасақталған құрама команда бөлек қатысады. Сол себепті жарыс өте тартысты өтеді деп сенемін», - деді Нұр-Сұлтан қаласы әкімдігінің «№1 Балалар мен жасөспірімдердің мамандандырылған олимпиадалық резерві спорт мектебі» КММ басшысы Әбілқайыр Сайранбек.
Еліміздің әр өңірінен жиналған талантты қыздар өнерлерін көрсетіп жатыр.
«Бұл – Қазақстан ішіндегі ең үлкен жарыс. Сондықтан спортшылардың бәрін көріп шығамын. Топтық командаларды да назарымызға аламыз. Себебі қазір Азия чемпионатына дайындық жүргізіп жатырмыз», - деді Қазақстан гимнастика федерациясының президенті Әлия Жүсіпова.