Бүгін осы жұмыстардың барысын көрсету үшін баспасөз туры өтті. Журналистер Қараөткел шағын ауданындағы су құбыры желілерін жаңғырту жұмыстарымен танысты.
Сондай-ақ шарада кәсіпорын сатып алған арнайы техникалар көрсетілді.
Биыл бұл мақсатта 4,9 млрд теңге қарастырылған.
Қаражаттың бір бөлігі 800 метр кәріз желісін салуға жұмсалып, бұл жұмыс толық аяқталған.
Тағы 6,9 шақырым ескі әрі жиі апат болатын су желісін жаңарту жоспарланған. Оның 5,4 шақырымы жаңартылды. Бұл жұмыстарға 2 млрд теңге жұмсалған.
Бұдан бөлек, 8 нысандағы 20 сорғы, сондай-ақ кәріз жүйесіндегі тағы 11 сорғы жаңартылады. Оған 600 млн теңге бөлінген. Кәсіпорын жаңа арнайы техника мен қажетті жабдықтар да сатып алып жатыр.
Мамандардың айтуынша, ескі құбырларды жаңарту қаладағы апат санын азайтып, судың үздіксіз берілуіне мүмкіндік береді.
— Жаңғырту жұмыстары аяқталғаннан кейін апаттық жағдайлар айтарлықтай азаяды деп күтіледі. Барлық құбыр жаңартылған соң, олар шамамен 20 жыл бойы қалыпты жұмыс істей алады. Қазір қала тұрғындарынан тәулігіне орта есеппен 50-ге жуық апатқа қатысты өтініш түседі. Жаңғырту нәтижесінде бұл көрсеткішті 20 пайызға төмендетуді жоспарлап отырмыз, — деді «Астана су арнасы» МКК бас директорының бірінші орынбасары Ержан Шәріпов.
2021-2025 жылдары «Астана су арнасының» инвестициялық бағдарламасына 10,2 млрд теңге жұмсалған.
Еске сала кетейік, бұған дейін Астанада электр желілерін жаңғыртуға 8,5 млрд теңге инвестиция бағытталғаны туралы жазған едік.