Астанада заңсыз майнинг: 900 млн теңгеден астам мүлік тәркіленді

АСТАНА. KAZINFORM – Заңсыз жолмен алынған цифрлық активтер 143 млн теңгеден асады. Бұл туралы Қаржылық мониторинг агенттігінің баспасөз қызметі хабарлады. 

Астанада 2022 жылдан 2024 жылдың мамырына дейін майнинг фермасын қозғалтқыштарды өңдеу орталығы ретінде жасырып, бір мегаполистің тұрғын ауданымен салыстырғанда айлық электр энергиясын тұтынған үш азаматқа қатысты айыптау үкімі шығарылды.

Заңсыз жолмен алынған цифрлық активтер 143 млн теңгеден асады.

— Тінту барысында 1 257 асикмайнер (цифрлық активтерді өндіруге арналған жабдық), өнеркәсіптік салқындатқыш желдеткіштер мен трансформаторлық станция алынды, — делінген ҚМА хабарламасында.

Сот оларды ҚК 214-бабының 2-тармағы бойынша кінәлі деп танып, айыппұл салу жазасын тағайындады.

Сот шешімімен мемлекет пайдасына 900 млн теңгеден астам мүлік: 2 көлік («Toyota Camry», «Nissan Juke») және майнинг жабдықтары тәркіленді.

— Сот қылмыстық табыс мөлшері ретінде 143,2 млн теңгені мемлекетке қайтаруды міндеттеді, — делінген хабарламада.

Үкім заңды күшіне енді.

Айта кетелік Қазақстанда майнингпен айналысатындар қалай жұмыс істейтіні туралы жазған едік.