Атырау экологтері атмосфералық ауадан сынама алды
АТЫРАУ. KAZINFORM – Атырау облысының экологтері атмосфералық ауаның спасын тексеру үшін сынама алды.
Атырау облыстық экология департаментінің баспасөз қызметі ұсынған ақпаратқа қарағанда, 6 қаңтарда әлеуметтік желіде «Атырау мұнай өңдеу зауыты» ЖШС-ға қатысты шағымдар жүктелген.
– Тұрғындардың шағымына байланысты «Казгидромет» РМК-ның Атырау филиалы және «АМӨЗ» ЖШС-нің өкілдерімен бірге атмосфералық ауадан сынама алу жұмысы жүргізілді. Желдің соғу бағыты бойынша «АМӨЗ» ЖШС-нің санитарлық қорғау аймағының оңтүстік шекарасынан күкірсутек (H2S), көмірсутектер (С6-С10), көміртегі оксиді (СО) секілді ластаушы ингредиенттерге сынама алынды. Сынамаға талдау жүргізілді. Желдің бағыты солтүстіктен, жылдамдығы секундына 2 метр болды, - деп хабарлады департаменттің баспасөз қызметі.
Сынамаларды талдау нәтижесімен рұқсат етілген шекті шоғырланудан асу дерегі анықталмаған.
Еске сала кетелік, бұдан бұрын Атырау мұнай өңдеу зауытының қондырғысынан будақтап бу көтеріліп жатқанын хабарлаған болатынбыз.