ОРАЛ. ҚазАқпарат – Атыраудан келіп, Оралда 15 велосипед жымқырған ұры қолға түсті, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, атыраулық 26 жастағы ұры екі ай бойы Оралда осындай «кәсіп» жасаған.
Ол қыркүйек айынан бері кешкі 18.00 мен түнгі 23.00 сағат аралығында көзіне түскен велосипедтерді ұрлап, сатумен айналысқан.
Атыраудан келген «гастролер» 5 қараша күні қала орталығында кезекті велосипед ұрлап жатқан жерінен қолға түсті. Ол Д.Қонаев шағынауданында 41 жастағы әйелге тиесілі велосипедті қолды қылып, 40 мың теңге залал келтірген.
Еш жерде жұмыс істемейтін күдікті айыбын мойындап, 15 велосипедті қалай ұрлағанын айтып берді.
Қазіргі кезде ҚР ҚК 188-бабына сәйкес 15 эпизод бойынша тергеу амалдары жүргізілуде.
Айта кетейік, биылғы тоғыз айда қалада 47 велосипед ұрлығы тіркеліп, соның 30-ы иелеріне қайтарылған.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).