АТЫРАУ. ҚазАқпарат – Атыраулық тұрғынның бірнеше атыс қаруын гаражда заңсыз сақтағаны анықталды. Қазір күдіктіге қатысты сотқа дейінгі тергеу басталды, деп хабарлайды ҚазАқпарат.
Облыстық полиция департаментінің баспасөз қызметінен мәлім еткендей, 24 жастағы Атырау тұрғыны 6 қарашада ұсталған.
«Облыстық полиция департаментінің ұйымдасқан қылмысқа қарсы күрес басқармасы мен Ұлттық қауіпсіздік комитетінің Атырау облысы бойынша департаментінің қызметкерлері бірлескен іс-шара өткізіп, бірнеше атыс қаруын заңсыз сақтаған Атырау қаласының тұрғынын анықтады. Ер адамның гаражын тінту кезінде 2 дана қосауызды, 1 дана бірауызды аңшы мылтығының бөліктері, 2 дана атыс қаруы, резеңке таяқша, тапаншаның бөлшектері мен электрлі шокер табылып, тәркіленіп алынды. Қазіргі уақытта қару-жарақ құралдарын заңсыз сақтаған 1998 жылғы күдікті ұсталды. Тәркіленген атыс қаруларына баллистикалық зерттеу жүргізу үшін сараптама тағайындалды», -деп хабарлады департаменттің баспасөз қызметі.
Ұйымдасқан қылмысқа қарсы күрес басқармасының қызметкерлері үдіктіге қатысты дерек бойынша ҚР Қылмыстық кодексінің 287-бабының 2-бөлігі бойынша сотқа дейінгі тергеу басталды.
Еске сала кетелік, бұған дейін Атырауда браконьерлерден бекіре мен есірткі тәркіленгенін хабарлаған болатынбыз.
Жолдасбек Шөпеғұл
1993 жылы әл-Фараби атындағы ҚазМҰУ-дің журналистика факультетін бітірген. Еңбек жолын 1993 жылы республикалық «Егемен Қазақстан» газетінде тілші болып бастаған. 2020 жылғы ақпаннан бері «Kazinform» халықаралық ақпарат агенттігінде Атырау облысындағы тілшісі болып жұмыс істейді.