АСТАНА. KAZINFORM – Қазақстандық теннисші Анна Данилина аралас жұпта Аустралия ашық чемпионатының ширек финалына өтті.
Қазақстандық теннисші америкалық Джеймс Трейсимен бірге екінші айналымда канадалық Лейла Фернандес – аустралиялық Ник Кирьоспен ойнады.
Бірінші партияда қазақстандық-америкалық дуэт 6:3 есебімен басымдылық танытты. Олар екінші сетте қарқынын тіпті үдетті – 6:1.
Небәрі 54 минутқа созылған бәсекеде Данилина – Треймс 1 эйспен бірге 8 брейк-пойнттың тең жартысын мүлт жіберген жоқ. Фернандес – Кирьос 8 эйс жасап, 7 брейк-пойнттың біреуін ғана пайдаланды.
Анна Данилина – Джеймс Трейси жартылай финалға шығу үшін бразилиялық Луиза Стефани – сальвадорлық Марсело Ареваломен таласады.
Бұдан бұрын А.Данилина сербиялық Александра Круничпен бірге жұптық сында да ширек финалға шыққан болатын.
Еске сала кетейік, бұдан бұрын Аустралия ашық чемпионатында Заңғар Нұрланұлының үшінші айналымға жолдама алғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).