АСТАНА. KAZINFORM – Қазақстанның екінші, әлемнің 94-ракеткасы Юлия Путинцева Аустралия ашық чемпионатының үшінші айналымына шықты.
Қазақстандық теннисші екінші айналымда әлемнің 60-ракеткасы, франциялық Эльза Жакемомен ойнады.
Бірінші партияда Путинцева айқын басымдылық көрсетті – 6:1.
Екінші сетте де сол қарқынынан танған жоқ – 6:2.
Бір сағат 14 минутқа созылған бәсекеде Путинцева 6 брейк-пойнттың бесеуін мүлтіксіз пайдаланды. Жакемо 1 эйс, 1 брейкпен (7 брейк-пойнт) шектелді.
Юлия Путинцева төртінші айналымға өту үшін әлемдік рейтингіде 112-де тұрған түркиялық Зейнеп Сонмезбен таласады. Ол бастапқы кездесуінде сенсация жасап, әлемнің 11-ракеткасы, ресейлік Екатерина Александрованы 7:5, 4:6, 6:4 есебімен ұтты. З.Сонмез «Үлкен дулыға» турнирінде қарсыласын жеңген алғашқы түркиялық теннисші атанды. Зейнеп бүгін әлемнің 74-ракеткасы, мажарстандық Анна Бондарьды қапы қалдырды – 6:2, 6:4.
Юлия Путинцева өткен жылы үшінші айналымға дейін жеткен еді.
Бұдан бұрын Елена Рыбакинаның бастапқы кездесуін жеңіспен аяқтағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).