Әйелін үнемі ұрып келген экс-дипломат Сәкен Мамаштың ісі сотқа жіберілді
АСТАНА. KAZINFORM — Бұрынғы дипломаттың ісін енді сот қарайды. Бұл туралы елорда сотының баспасөз қызметі хабарлайды.
— Алғашқы сот отырысы 29 мамырда өтеді. Істі қылмыстық істер жөніндегі ауданаралық сот қарайды, — делінген елорда соты таратқан хабарламада.
Айта кетейік, Қазақстанның Біріккен Араб Әмірліктеріндегі елшінің кеңесшісі болған Сәкен Мамаш биыл 4 сәуірде қамауға алынды.
Еске сала кетсек, былтыр мамырда Қазақстанның БАӘ-дегі елшіліктің кеңесшісі Сәкен Мамаш әйеліне үнемі күш көрсеткені, тіпті жұбайының әпкесіне де қол көтергені туралы хабарлаған едік.
Артынша әйелін ұрды деп айыпталған қазақстандық дипломатқа қылмыстық іс қозғалды.
Сондай-ақ елші кеңесшісінің әйелі Карина Мамаш дағдарыс орталығына орналастырылды.
Кейін Карина Мамаш жеке басына қайта қауіп төнгенін айтты.
Осы жайттан кейін әйелін ұрған экс-дипломатқа қатысты тағы бір қылмыстық іс қозғалды.