Еркін күрестен ұлттық құрама көшбасшысы Азамат Дəулетбеков (86 келі) Хорватия астанасы Загреб қаласында өтіп жатқан Zagreb Open рейтингілік турнирінде күміс жүлдегер атанды, деп хабарлайды Kazinform.
Қазақстандық балуан алғашқы белдесуінде үндістандық Дипак Пунияны 6:2 есебімен қапы қалдырды.
Қарсыласы 2019 жылғы əлем чемпионатының күміс жүлдегері атанған тәжірибелі балуан еді.
Одан кейін Азамат украиндық Валентин Бабий мен грузиялық Евсем Швелидзені тізе бүктіріп, финалға жолдама алды.
Финалда Болгария атынан сынға түсіп жүрген ресейлік Магомед Рамазановқа 5:8 есебімен есе жіберді.
Азамат былтыр Сербия астанасы Белградта өткен əлем чемпионатында қола жүлдеге ие болып, Париж Олимпиадасының жолдамасына қол жеткізді.
Айта кетейік, рейтингілік бəсекеде еліміздің атынан Ирина Казюлина (65 келі), Елена Шалыгина (68 келі) мен Эльмира Сыздықова (76 келі) күш сынасады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.