АСТАНА. KAZINFORM - Гандболдан Қазақстан әйелдер құрамасы Нью-Делиде (Үндістан) өтіп жатқан Азия чемпионатында екінші кездесуінде Оңтүстік Кореяға есе жіберді.
Бүгінгі қарсыласымыз осал емес. 1988, 1992 жылдары Олимпиада чемпионы атанса, 1995 жылы әлем чемпионы тұғырына көтерілді. Ал Азия чемпионатында 16 мәрте алтыннан алқа тақты.
Кездесу барысында қазақстандық гандболшылар қарсыласына 20:30 есебімен есе жіберді.
Қазақстандық гандболшылар А тобында ойын көрсетеді. Қарсыластары - Қытай, Сингапур және Оңтүстік Корея.
Алғашқы турда ел құрамасы Қытайды 28:26 есебімен тізе бүктірсе, енді 6 желтоқсанда олар Сингапурмен ойнайды.
Ал В тобында Жапония, Үндістан, Гонконг және Иран сынға түсіп жатыр.
Әрбір топтан алғашқы екі орындағы құрамалар плей-офф сатысына жолдама алады.
Гандболдан Қазақстан әйелдер құрамасы 2002, 2010 жылдары Азия чемпионы атағын жеңіп алса, 2021 жылы қола жүлдегер атанды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.