ОРАЛ. KAZINFORM – Батыс Қазақстан облысында ұшқышсыз ұшатын аппаратқа ұқсас заттың табылуына байланысты тексеру жұмыстары жүргізіліп жатыр.
БҚО полиция департаментінің баспасөз қызметінен мәлім еткеніндей, зат Тасқала ауданында елді мекеннен қашық аумақта құлаған.
— Зат тұтас күйінде табылған, ақауы байқалмайды. Қазіргі кезде оқиғаның мән-жайы анықталу үстінде, — деп хабарлады ведомстводан.
Тұрғындардың сөзіне қарағанда, аталмыш зат Қазақстан ауылдық округі Атамекен ауылынан 18 шақырым жерде 18 наурыз күні табылған. Оның ұзындығы 3 метр шамасында.
Бұдан дәл бір ай бұрын осындай зат Бөкей ордасы ауданы аумағына құлаған еді.
Еске сала кетейік, бұдан бұрын БҚО аумағына ұшқышсыз ұшатын аппаратқа ұқсас зат құлағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).