ОРАЛ. ҚазАқпарат – Батыс Қазақстан облысында 42 жастағы әйел босану үстінде көз жұмды, деп хабарлайды ҚазАқпарат тілшісі.
БҚО денсаулық сақтау басқармасының баспасөз қызметі мәлім еткеніндей, Ақсай қаласында тұрған әйелдің бұл бесінші жүктілігі, үшінші рет босануы болатын.
Мерзімінен бұрын бала жолдасы ажыраған әйел 10 қараша күні Оралдағы қалалық көпбейінді ауруханаға жеткізілген.
«Күрт қан жоғалту салдарынан құрсағындағы шақалағы шетінеп кеткен әйелдің ауруханаға түскен кезде жағдайы ауыр болған. Шұғыл ота жасау кезінде клиникалық өлім тіркелген. Жүрек-өкпеге жансақтау шаралары жүргізіліп, жүрек қызметі қалпына келтірілген. Алайда жасалынған шараларға қарамастан, жүрегі қайта тоқтап қалған», деп хабарлады ведомстводан.
Еске сала кетейік, бұдан бұрын Оралда түйреуіш жұтып қойған алты айлық сәбидің көз жұмғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).