ОРАЛ. ҚазАқпарат – Бөкей ордасы ауданы орталығы Сайқын ауылында дене шынықтыру-сауықтыру кешені пайдалануға берілді, деп хабарлайды ҚазАқпарат тілшісі.
Заманауи ғимараттың ашылу рәсіміне қатысқан облыс әкімі Ғали Есқалиев жаңа кешенде жастар мен ересектердің спортпен белсенді айналысып, денсаулықтарын шыңдауға мүмкіндік мол екендігін жеткізді.
«Ұлтжанды ұрпақты тәрбиелеуде спорттың маңызы ерекше. Кеңес дәуірінде осындай шалғай ауылдарға аса назар аударылмағаны белгілі. Еліміз тәуелсіздік алғаннан бергі кезеңде ауданға табиғи газ құбыры тартылды. Елбасының тапсырмасына сәйкес облыс орталығымен жалғастыратын қатқыл табанды жол салынуда. Өңірде Қарашығанақты игеріп жатқан «Қарашығанақ Петролиум Оперейтинг б.в.» компаниясының қаржысына әлеуметтік нысандар бой көтеруде. Соның бірі – осы дене шынықтыру-сауықтыру кешені», деді өңір басшысы.
Ауқымды аумақты алып жатқан ғимараттың құны – 428,531 млн теңге.
Рәсім барысында құрылысқа тапсырыс беруші «ҚПО б.в.» компаниясы мен жауапты мердігер «Наурыз» ЖШС атына алғыс айтылды.
160 адамға арналған кешенге келушілер күрес, бокс, баскетбол, волейбол, үстел теннисі және басқа спорт түрлерімен шұғылдана алады.
Еске сала кетейік, бұдан бұрын Батыс Қазақстан облысында үздік спортшылар мен бапкерлер марапатталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).