ОРАЛ. ҚазАқпарат – Батыс Қазақстан облысында күшті жел ғимараттардың шатырын жұлып әкетті, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткеніндей, оқиға 29 маусым күні кешкісін Жаңақала және Казталов аудандарында болды.
Екпіні секундына 19 метрге дейін жеткен желдің салдарынан сағат 20.50-де Жаңақала ауданы Жаңақала ауылында алаңы 215 шаршы метр қос қабатты музей ғимаратының шатыры сыпырылып түсті. Ғимарат 1982 жылы салынған. 2015 жылы соңғы жөндеу жасалған.
Сондай-ақ Казталов ауданы Талдыапан ауылында 2 қабатты мектеп ғимаратының шатыры (алаңы 600 шаршы метр) құлады. 1982 жылы салынған мектептің жалпы ауданы – 3150 шаршы метр. Соңғы жөндеу 2010 жылы жүргізілген.
Оған қоса осы ауылда қос қабатты «Балбөбек» балабақшаның шифері де (алаңы 20 шаршы метр) жерге түсті. Жалпы ауданы 729 шаршы метр балабақша 1986 жылы бой көтеріп, 2005 жылы жөнделген.
Зардап шеккендер жоқ. Қазіргі кезде келтірілген шығын анықталып жатыр.
Еске сала кетейік, бұдан бұрын Оралда екі көлік соқтығысып, 2 адамның ауруханаға түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).