ОРАЛ. ҚазАқпарат – Батыс Қазақстан облысында жүргізуші 51 жастағы әйелді қағып, қашып кеткен, деп хабарлайды ҚазАқпарат тілшісі.
БҚО полиция департаментінің баспасөз қызметінен мәлім еткендей, оқиға 13 шілде күні шамамен сағат 08.30-да Теректі ауданы Пойма ауылы маңында болды.
«Белгісіз жүргізуші жол шетінде тұрған 1972 жылғы әйелді қағып, оқиға орнынан бой тасалаған. Жол апатынан жарақат алған әйел ауруханаға жеткізілді. Қазіргі уақытта жүргізушіні анықтау бойынша жұмыстар жүргізілуде», деп хабарлады ведомстводан.
БҚО денсаулық сақтау басқармасы баспасөз қызметінің нақтылауынша, зардап шеккен әйел жедел жәрдем бригадасымен Оралдағы қалалық көпбейінді аурухананың қабылдау бөліміне сағат 09.30-да жеткізілген.
Кеуде қуысы, жамбас сүйектері мен буындарының және тізе буындарының рентгенографиясы, басқа да зертханалық зерттеулер жасалды.
Нейрохирургия бөлімшесіне жатқызылған әйелдің жағдайы орташа ауыр.
Еске сала кетейік, бұдан бұрын Оралда автокөлік қағып кеткен 64 жастағы ер адамның мерт болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).