АСТАНА. KAZINFORM — Қазақстанның бірінші, әлемнің 11-ракеткасы Елена Рыбакина Берлин (Германия) WTA 500 турнирінің жартылай финалынан тыс қалды.
Қазақстандық теннисші ширек финалда әлемнің 1-ракеткасы, белоруссиялық Арина Соболенкомен сынға түсті.
Осыған дейін қарсыластар өзара он рет кездесіп, соның төртеуінде Рыбакина жеңген еді.
Екі сағат 44 минутқа созылған тартысты матчта Соболенко 7:6 (8:6), 3:6, 7:6 (8:6) есебімен жеңіске жетті. Өкінішке қарай, шешуші тай-брейкте есеп 6:2 болып, қазақстандық теннисші төрт бірдей матчболды пайдалана алмады.
Бәсеке барысында Рыбакина 14 эйс, 6 брейкпен (10 брейк-пойнт) көзге түсті.
Арина Соболенко финалға шығу үшін чехиялық Маркета Вондроушовамен таласады.
Еске сала кетейік, бұдан бұрын Александр Бубликтің Германиядағы жарыстың жартылай финалына өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).