Қазақстан теннис федерациясының баспасөз қызметінен мәлім еткеніндей, аталмыш матчта ел намысын қорғайтын теннисшілер анықталды.
Команданың жаңартылған құрамына тәжірибелі, сондай-ақ жас ойыншылар енді:
— Анна Данилина (жұптық сын, № 6 WTA);
— Юлия Путинцева (№ 76 WTA);
— Жібек Құламбаева (жұптық сын, № 178 WTA);
— Аружан Сағындықова (№ 871 WTA);
— Соня Жиенбаева (№ 1018 WTA).
Ұлттық құрама көшбасшысы, әлемнің 3-ракеткасы Елена Рыбакина бұл кездесуге қатыспайды. Бұл шешім Қазақстан теннис федерациясы, спортшы мен оның бапкерлік штабымен қабылданды. Еленаның биылғы басты мақсаты — әлемнің бірінші ракеткасы атану үшін таласу. Егер қазақстандық теннисші WTA рейтингісінде көш бастаса, бұл Қазақстан үшін тарихи табыс болмақ. Сондықтан барлық күш осыған жұмылдырылған.
Билли Джин Кинг рейтингісінде 4-орындағы Канада құрамасы — 2023 жылғы турнир жеңімпазы, биылғы фавориттердің бірі.
Солтүстікамерикалық команда Астанаға мына құрамда келмек:
— Виктория Мбоко (№ 10 WTA),
— Габриэла Дабровски (жұптық сын, № 2 WTA),
— Марина Стакусич (№ 130 WTA),
— Бьянка Андрееску (№ 165 WTA, жұптық сында 160-орын),
— Кайла Кросс (№ 194 WTA, жұптық сында 131-орын).
Матч жеңімпазы командалық әлем чемпионатының финалдық кезеңіне жолдама алады.
Еске сала кетейік, бұдан бұрын Индиан-Уэллс турнирінде Анна Данилинаның финалға шығу үшін таласатынын жазған болатынбыз.
Сондай-ақ ширек финалға шыққан Елена Рыбакина өткен жылғы көрсеткішін жақсартты.