АСТАНА. KAZINFORM - Қазақстан теннис федерациясы Билли Джин Кинг кубогының финалдық кезеңіне қатысатын Қазақстан әйелдер ұлттық құрамасының ресми тізімін жариялады.
Қытайдың Шэньчжэнь қаласында 22-27 қыркүйек аралығында өтетін командалық әлем чемпионатында ел намысын әлемдік рейтингіге ТОП-10-ға кіретін теннисшілермен қатар жас спортшылар қорғайды.
Атап айтқанда, әлемнің 2-ракеткасы Елена Рыбакина, жұптық сында рейтингіде 6-орында тұрған Анна Данилина, сондай-ақ Юлия Путинцева, Жібек Құламбаева, Соня Жиенбаева бар.
Команда капитаны - Юрий Щукин.
Қазақстандықтар алғашқы матчын Испания құрамасымен өткізеді. Ширек финалдық ойын 23 қыркүйекте Қазақстан уақытымен сағат 14.00-де басталады.
Еске сала кетейік, бұдан бұрын Соня Жиенбаеваның Ирландиядағы турнирдің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).