Бірінші лигада «Ақжайық» Астанада «Жеңістен» жеңіліп қалды

АСТАНА. ҚазАқпарат – Футболдан бірінші лига командалары арасында Қазақстан біріншілігінің төртінші турында «Жеңіс» өз алаңында Оралдың «Ақжайығын» қабылдады, деп хабарлайды ҚазАқпарат тілшісі.

Бірінші таймда 5-минутта алаң иелерінен гамбиялық Па Омар Жобе есеп ашты.

Екінші кезеңде грузиялық Торнике Дзебниаури 81-минутта есепті 2:0-ге жеткізді. Арада екі минут өткенде, «Ақжайық» сапындағы украиналық Микола Агапов бір голмен жауап қайырды.

Осылайша, ойын барысында өз мүмкіндіктерін пайдалана алмаған оралдықтар биылғы маусымда алғаш рет жеңіліс тапты – 1:2.

Бұл турда сондай-ақ түркістандық «Тұран» сырт алаңда «Ақтөбе-Жас» командасын 6:1 есебімен ұтып, турнир кестесінде 9 ұпаймен көш басына көтерілді. Үш матч өткізген түркістандықтар әзірге ешқандай ұпай жоғалтқан жоқ.

Сырт алаңда «Академия Оңтүстік» командасын 5:2 есебімен тізе бүктірген «Арыс» төрт ойыннан кейін 9 ұпай жинап, екінші орынға шықты.

«Қыран» «Қайрат-Жастардан» 4:3 есебімен айласын асырды.

Еске сала кетейік, бұдан бұрын бірінші лигада «Ақжайық» пен «Елімайдың» жеңіске жеткенін жазған болатынбыз.

Сондай-ақ «Жетісу» футбол клубының бас бапкері ауысты.

«Манчестер Сити» шабуылшысы Ағылшын лигасында рекорд орнатты.