Бірнеше мәрте ұрлық жасаған қызылордалық ұсталды
Қызылорда қаласының тұрғыны полицияның кезекші бөліміне пәтер ұрлығы туралы шағым түсірді. Онда белгісіз адамның жеке үйлердің бірінде пластикалық терезесін ашып кіріп, алтын бұйымдарын ұрлап кеткені айтылған. Пәтер ұрлығы күндізгі уақытта жасалған. Сол сәтте үйде ешкімнің болмағанын байқаған күдікті өзінің арам ойын жүзеге асырған. Соның салдарынан ол жәбірленушіге жалпы 760 мың теңге материалдық шығын келтірген.
«Одан кейін күдікті ұрланған заттарды ломбардқа өткізгені белгілі болып отыр. Полиция қызметкерлері жедел іс-шаралар жүргізді. Нәтижесінде күдікті азамат компъютер клубтарының бірінде ұсталды. Қазіргі уақытта күдікті уақытша ұстау изоляторына қамаққа алынды. Тергеу барысында күдіктінің қалада жасалған осы тектес басқа да бес қылмысқа қатысы бар екендігі дәлелденді. Барлық деректер бойынша Қылмыстық кодексінің 188-бабы 2-бөлігінің 3-тармағына сәйкес сотқа дейінгі тергеп-тексеру жүргізілуде», - деп мәлім етті Қызылорда облыстық полиция департаментінің баспасөз қызметі.
Бұдан бұрын Қызылорда тұрғыны көшеде шолақ мылтық алып жүрген тұрғынның қолға түскенін хабарлаған едік.