ОРАЛ. KAZINFORM — Батыс Қазақстан облысында жол бойында автобустың жанып жатқаны түсірілген бейнежазба таралды.
Бейнежазбада автобустан жолаушылардың шығып келе жатқаны көрінеді. Олардың арасында жасы ұлғайған адамдар, балалы әйелдер бар.
- Орал мен Қаратөбе арасында қатынайтын автобус. Әрең құтылып шықтық, - дейді жолаушылардың бірі.
БҚО ТЖ департаментінің баспасөз қызметінен мәлім еткеніндей, 8 тамыз күні кешке жедел кезекшінің пультіне Теректі ауданында Самара-Шымкент автожолының Шалқар көліне бұрылатын тұсында автобустың өртеніп жатқаны жөнінде хабарлама түскен.
- Автобус салонында 37 жолаушы болған. Олар қауіпсіз жерге өздері шыққан. Зардап шеккендер жоқ. Өрт БҚО ТЖД жеке құрамынан 8 адам және 2 техниканың жедел әрі үйлесімді әрекетінің арқасында толық сөндірілді. Қазіргі кезде өрттің себебі анықталу үстінде, - деп хабарлады ведомстводан.
Еске сала кетейік, бұдан бұрын Оралда қатты тұрмыстық қалдықтар полигоны өртенгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).