ОРАЛ. KAZINFORM — Батыс Қазақстан облысында ауыл халқының 97 пайызы ауыз сумен қамтылып отыр.
БҚО құрылыс басқармасының басшысы Нұркен Молдашевтің мәлім еткеніндей, өңірде 413 ауылдың 307-сіне орталықтандырылған су жеткізілген.
Нұркен Еділұлының сөзіне қарағанда, биылғы жылы 9 млрд теңгеге 15 ауыл орталықтандырылған сумен жабдықталып, 40 елді мекенде кешенді блок-модуль орнатылмақшы.
— Биыл жыл соңында 8 мыңдай адам таза ауыз сумен қамтылады. Нәтижесінде облыс халқы 100 пайыз орталықтандырылған ауыз сумен қамтамасыз етілетін болады. Осы орайда ауыз судың сапасына ерекше мән беріледі, — деді Н.Молдашев.
Басқарма мәліметіне қарағанда, өткен жылы 35 мыңнан астам тұрғыны бар 20 ауылға су құбыры тартылып, бұл мақсатқа 5,7 млрд теңге бөлінді. Сонымен қатар шамамен 1 мың тұрғыны бар 12 елді мекенде кешенді блок-модульдер орнатылған еді.
Еске сала кетейік, Батыс Қазақстан облысында екі ауылдың ауыз сумен қамтылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).